19Apirila2024

005.jpg
Zu hemen zaude: Albiste nabarmenak
AMASA VILLABONAKO UDALA

Udalak superabitarekin itxi du 2023ko ekitaldia

Atzo izandako Ogasun batzorde informatzailean Udaleko kontu-hartzailetzak 2023ko aurrekontuaren likidazioaren berri eman zuen eta, besteak beste, Udalak 2023 urteko ekitaldia 862.700,88 euroko superabitarekin amaitu zuela azaldu zuen. Datu horrek Udalaren osasun finantzario ona eta diru-publikoaren kudeaketa arduratsua erakusten ditu.

Aurrekontuaren hazkundea
Egindako aurrekontu-likidazioan agerian geratu da 2023ko aurrekontu orokorra, 7.428.723,45 eurorekin abiatu bazen ere, 10.410.858,49 eurokoa izatera iritsi zela urtean zehar egindako kreditu aldaketak eta jasotako diru sarrera berriak direla medio.

Inbertsioen exekuzio altua
2023an zehar burutu ziren inbertsioei dagokienez, Udalak, guztira, 1.515.987,98 euroko inbertsioak egin zituen herrian, eta honako hauek nabarmentzen dira:

  • Olaederra kiroldegiko teilatuaren birmoldaketa
  • Larreako parke estalia
  • Espaloiak eta eta asfaltatze lanak
  • Kale argiteriaren luminaria berriak
  • Fleming Herri eskolako azpiegiturak hobetzeko obrak
  • Arroako eskolako teilatuan jarritako eguzki panelak

Diruzaintzako gerakinak hazten jarraitzen du
2023ko kontuak itxita, une honetan guztira 3.901.670,96 euroko diruzaintza gerakina du Amasa-Villabonako Udalak. Gerakinean dagoen kopuru ekonomiko aipagarri honen bidez, etorkizunean ez-ohiko inbertsio esanguratsuak zuzenean bere baliabide ekonomikoekin finantzatzeko aukera izango du Udalak, kreditua eskatu edo zorpetu beharrik gabe.

Zor publikoa minimoetan
Udaleko kontu-hartzailetzak Ogasun batzordean emandako datuen arabera, 2023ko abenduaren 31n, 606.867,82 euroko zor publikoa zuen Villabonako Udalak. 2019 urte amaieran 1.349.376,47 eurokoa zela kontuan hartzen badugu, 742.508,65 euroan gutxitu da zor publikoa, hau da, %55,03 jaitsiera izan du.

Laburbilduz, 2023. urteko ekitaldiari buruzko datu ekonomikoek, kudeaketa eraginkorra eta arduratsua izan dela islatzen dute, eta Udalaren egoera finantzario osasuntsu eta positiboaren adierazle dira. Era berean, baliabide publikoak eraginkortasunez kudeatu izanaren seinale ere badira. Inbertsioak igotzearekin batera, zor publikoa erdira murriztea eta era berean diruzaintzako gerakina nabarmen handitu izana, albiste oso positiboa da Amasa-Villabonako Udalaren finantza egonkortasunerako.

20240318MerkataritzanAdos

Merkataritzan Ados! Mahai ireki eta parte-hartzailea jarriko du martxan Udalak

Herriko merkataritza sustatzen jarraitzeko konpromisoari eutsiz, Merkataritzan Ados! mahai parte-hartzailea sortzeko urratsa eman du Udalak, Oria Merkatarien Elkartearekin adostasunez. Mahai edo foro berri honek izango duen erronka nagusia, herriko merkataritza sustatzeko Udal-politika definitzea izango da, horretarako 2022. urteko Villabonako Merkataritza Indarberritzeko Plan Berezia-n definitutako ekintza-plana garatuz.

Udal honentzat komunitatearen parte-hartze aktiboa funtsezkoa denez, lan-mahai berri honek ere izaera publikoa, irekia eta parte-hartzailea izango du. Beraz, mahai honetako protagonista nagusiak udal ordezkariak eta herriko merkatariak izango badira ere, ideiak, iradokizunak eta proposamenak izan ditzaketen herritar (edo bezero) guztiek parte hartzeko aukera izango dute.

Herriko merkataritza sustatzeko 85.000 euroko aurrekontua, 2024an
Herriko merkataritza sustatzeko 85.000 euro bideratuko ditu Udalak aurten, eta udal aurrekontuak jasotzen duen moduan, lau partida ekonomikotan banatzen da kopuru hori:

  • Herriko merkataritzaren sustapena: 10.000 €
  • Oria Merkatarien Elkartearekin lankidetza hitzarmena: 13.000 €
  • Merkataritza Bonoen Kanpaina 2024: 57.000 €
  • Establezimendu berrien irekierarako dirulaguntzak: 5.000 €

Horrela, partida hauen exekuzioa edo erabilera nola egin, Merkataritzan Ados! mahaian eztabaidatu eta adostuko da modu publiko, ireki eta parte hartzailean. Aurreikusten da aurrekontu horrekin Udalak sentsibilizazio kanpainak, bono kanpaina berri bat, dirulaguntzak eta beste hainbat ekimen garatu ahal izango dituela urtean zehar.

Bilkurak bi hilean behin
Merkataritzan Ados! mahai irekia astelehenetan 13:30etan bilduko da eta bi hilean behineko maiztasuna izango du, ohiko bileretan bederen. Eguerdiko ordu berezi hori herriko merkatarien parte hartzea errazteko helburuarekin ezarri da, Oria Merkatarien Elkartearekin adostasunez. Bilkura bakoitza baino lehen, Udalak bilera deialdia argitaratuko du www.villabona.eus webgunean eta sare sozialetan dituen kanal ofizialetan.

Lehen bilkura: apirilaren 15ean, 13:30etan, Udaletxean
Mahai honen lehenengo batzarra datorren apirilaren 15ean izango da, eguerdiko 13:30etan, Udaletxeko Batzar Aretoan.

Harremanetarako kontaktua
Mahai partehartzaile honen arduradunekin zuzenean harremanetan jartzeko, kontsultak edota ekarpenak egiteko E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbide elektronikoa sortu da.

20240301 Iturrigoxo

Amasako Iturrigoxo taberna-jatetxearen ustiaketa esleitzeko lehiaketa zabalik

Interesdunek gaurtik martxoaren 22ra arteko epea dute eskabideak aurkezteko.

Otsaileko ohiko osoko bilkuran Amasako Iturrigoxo taberna-jatetxea ustiatzeko espedientea eta horren baldintza tekniko eta administratiboen agiriak onartu ziren. Era berean, lehiaketa prozesuari hasiera ematea ere erabaki zen. Alderdi guztiek aho batez onartu zituzten esleipenaren baldintzak jasotzen dituzten dokumentuak.

Aurkezteko epea: martxoaren 1etik 22ra
Iturrigoxo taberna-jatetxearen esleipen prozesuan parte hartzeko interesa dutenek 2024ko martxoaren 22ko 14:00ak baino lehen aurkeztu beharko dituzte hautagaitzak. Eskabidea telematikoki aurkeztu nahi dutenek euskadi.eus-eko kontratazio plataformaren bidez egiteko aukera dute. Beste aukera proposamena presentzialki Villabonako Udaletxeko herritarren arreta zerbitzuko bulegoan (behe solairuan) aurkeztea izango da.

Esleipen prozesua bi zatitan gauzatuko da
Amasako taberna-jatetxearen esleipen prozesuak bi zati izango ditu; Lehenengoan dokumentazio administratiboa aurkeztu beharko da eta Udal Kontratazio Mahaiak aukeratuko ditu hurrengo fasera igaroko diren hautagaiak. Bigarren fasean, aldiz, hautagaiek eskaintzak aurkeztu beharko dituzte.

Hilean 50 euroko kanona, gutxienez
Lizitatzaileek hileroko ekarpen ekonomikoa egin beharko diote Udalari kanon kontzeptuan eta gutxienez 50 eurokoa izan beharko du (41,32 euro + BEZ). Hautagaiek, kopuru hori igotzeko aukera izango dute aurkeztu beharreko eskaintzetan.

Kontratuak 5 urteko iraupena, 10 urtera arte luzatzeko aukerarekin
Amasako Iturrigoxo taberna-jatetxea ustiatzeko kontratuak 5 urteko iraupena izango du, eta aldeek horrela adostuz gero, urtez urte luzatzeko aukera egongo da. Nolanahi ere, kontratuak, luzapen guztiak barne, 10 urteko iraupena izango du gehienez ere.

Deskargatu pleguak

Kontratazio plataforma

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.