28Maiatza2024

004.jpg
Zu hemen zaude: Albisteak

Kategoria: Nabarmenak

20240502 Gaztelekua

Maiatzaren 8an irekiko ditu ateak Gaztelekuak

Denboraldi luze batez zerbitzuz kanpo egon ondoren, Villabonako Gaztelekua prest dago maiatzaren 8an berriro gaztetxoei ateak parez pare irekitzeko.

Herriko haur zein nerabeen denbora libre euskaldun eta parte-hartzailea sustatzeko helburua duen zerbitzu publiko hau berrikuntzekin dator, gainera. Hemendik aurrera bi adin-tarteko gaztetxoentzat eskainiko du zerbitzua; batetik, Haurtxoko zerbitzua, 8 eta 12 urte bitarteko haurrentzat, asteazken eta ostegunetan 17:00etatik 19:00etara. Eta bestetik, 12 eta 17 urte bitarteko nerabeentzat Gaztelekua ostiral, larunbat eta igandeetan irekiko da, 17:00etatik 20:00etara. Nabarmentzekoa da hau izango dela Gaztelekuak 12 urtetik beherakoei ere zerbitzua emango dien lehen aldia.

Hartxokoaren maiatzeko egitaraua

Gaztelekuaren maiatzeko egitaraua

Irekiera festa bereziak maiatzaren 8an eta 10ean
Etapa berri honi merezitako ongietorria egiteko irekiera festa bereziak antolatu dituzte Gaztelekuko arduradunek. Horrela, maiatzaren 8an, asteazkena, 8-12 urte bitartekoentzat Haurtxokoaren irekiera izango da arratsaldeko 17:00etan. Maiatzaren 10ean, aldiz, 12 eta 17 urte bitartekoentzat Gaztelekuaren irekiera berezia egingo da, hau ere arratsaldeko 17:00etatik aurrera.

Gaztelekuko irekieraren kartela

Komunitateak diseinatutako Gaztelekua
Gaztelekuak eskainiko duen zerbitzua herriko gazte eta nerabeen beharrak eta interesak identifikatzeko gauzatu zen parte-hartze prozesu baten bitartez diseinatu da, eta Udalak eskerrak eman nahi dizkie prozesu horretan parte hartu zuten haur, nerabe eta gurasoei.

Bide batez, Udalak zerbitzu publiko hau doakoa dela eta haur zein nerabe guztientzat zabalik dagoela nabarmendu nahi du, aldez aurretik izena eman beharrik gabe. Beraz, herriko gaztetxo guztiak gonbidatu nahi ditu Gaztelekura gerturatu eta aisialdiaz euskaraz gozatzera.

Kategoria: Albisteak

20240426 LarreIrekiera

Larre Irekiera festa egingo da maiatzaren 1ean, Komizar parkean

Asteazkenean, maiatzaren 1ean, Amasamendiko Larre Irekiera Festa egingo da Komizar parkean. Aurten, guztira, 971 abelburu larreratuko dira; 748 ardi, 134 behi, 58 zaldi eta 31 ahuntz.

Goizeko 11:00etan emango zaio hasiera aurtengo larretzeari, eta ondoren, musikarekin girotutako hamaiketakoa egiteko aukera egongo da.

Gehiago irakurri...

Kategoria: Nabarmenak

20240424 KredituAldaketa

Inbertsio garrantzitsuak finantzatzeko kreditu aldaketa onartu du Udalbatzak

Atzo arratsaldeko Amasa-Villabonako Udalbatzaren osoko bilkuran udal gobernuak proposatutako 1.637.056,28 euroko kreditu aldaketa esanguratsua onartu zen. 2024 urtean zehar Udalak hainbat inbertsio handi gauzatzeko edo gutxienez hasteko helburua du, eta horretarako, ezinbestekoa suertatu da inbertsioetara bideratuko den aurtengo aurrekontuaren finantziazioan gehikuntza hau egitea.

Besteak beste, honako inbertsioak burutzeko erabiliko da aurrekontuari erantsi zaizkion 1.637.056,28 euroak:

  • Udal Liburutegiaren handitzea eta eraberritze integrala (800.000 euro)
  • Txermingo aparkalekua eraberritzeko obra (200.000 euro)
  • Kale garbiketarako makina berria (173.750 euro)
  • Graficas Leitzaolako eraikina eraistea (145.000 euro)
  • Kiroldegiko erreformak (70.000 euro)
  • Kale Berriako obrak (Gipuzkoako Urak) (56.010,72)
  • Argiteria Otelarre, Legarreta, Amasa eta erdialdean (50.000 euro)
  • Kultur etxeko teilatuaren eraberritzea (39.000 euro)
  • Gurea zinemako segurtasun neurriak betetzeko lanak (37.718 euro)
  • Gaztelekuan berogailu sistema berria ezartzea (26.000 euro)
  • Oinezkoen zubiko lurra aldatzea (20.000 euro)
  • Informazio panel digital berria kalean (19.577,56 euro)

Finantziazio hori guztia Udalaren diruzaintza gerakinetik aterako da, eta gerakin hori 3,9 milioi eurokoa da une honetan.

Kreditu aldaketa hau EH Bilduko 8 ordezkarien aldeko botoekin eta EAJ-PNV eta PSEren 4 abstentzioekin onartu zen.

Azpikategoria

Zu hemen zaude: Albisteak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.